काठमाडौं । आईसीसी विश्वकप लिग टू अन्तर्गतको अन्तिम त्रिकोणात्मक सिरिजमा नेपालले पीएनजीविरुद्ध जित निकालेको छ ।
कीर्तिपुरस्थित टियु क्रिकेट मैदानमा भएको खेलमा नेपालले पीएनजीलाई ५२ रनले पराजित गरेको हो ।
पीएनजीविरुद्धको खेलमा नेपालका आसिफ शेख प्लेयर अफ द म्याच बनेका छन् । नेपालको जितमा आसिफले १ सय १० रनको शतकीय इनिङ खेलेका थिए । उनले दुई छक्का र १२ चौका प्रहार गरे । आसिफको यो अन्तर्राष्ट्रिय क्रिकेट करिअरको पहिलो एक दिवसीय शतक पनि हो । आसिफ नेपालबाट एकदिवसीयमा शतक प्रहार गर्ने पाँचौ नम्बरका खेलाडी बने । यसअघि राष्ट्रिय क्रिकेट टोलीका पूर्वकप्तान पारस खड्का, रोहित पौडेल, दीपेन्द्रसिंह ऐरी र कुशल भुर्तेलले शतक प्रहार गरेका थिए ।
यस्तै, आजको खेलबाट आसिफले एकदिवसीय अन्तराष्ट्रियमा १ हजार रन पुर्याएका छन् । एकदिवसीय अन्तराष्ट्रियमा १ हजार रन पूरा गर्ने आसिफ दोस्रो नेपाली खेलाडी हुन् । यस अघि कप्तान रोहित कुमार पौडेलले १ हजार रन बनाएका थिए ।
