चितवन । ‘कालोमोसो दस्ता’का केन्द्रीय संयोजक शम्भु थापालाई मंगलबार दिउँसो जिल्ला प्रशासन कार्यालय चितवनबाट पक्राउ गरिएको छ । थापा बैंक तथा वित्तीय संस्थाका प्रमुखहरुलाई कालोमोसो दल्ने भनेर धम्की दिने व्यवसायी दुर्गा प्रसाईंको ‘कालो दस्ता’ का केन्द्रीय संयोजक हुन् ।
प्रहरीले थापालाई सोधपुछका लागि नियन्त्रणमा लिइएको जनाएको छ । यही फागुन १३ गते व्यवसायी प्रसाईंले धर्म, संस्कृति, राष्ट्र, राष्ट्रियता र नागरिक अभियानको नाममा कार्यक्रम गर्दा थापालाई ‘कालोमोसो दस्ता’ का संयोजक तोकिएको थियो ।
प्रसाईं चितवन आएको दिन थापाको नेतृत्वमा कालोमोसो लेखिएको टिसर्ट लगाएर युवाहरु परिचालन गरिएको थियो । संयोजक थापाले उक्त कार्यक्रममा बैंक तथा वित्तीय संस्थाका प्रमुखहरुलाई कालोमोसो दल्ने घोषणा गरेका थिए ।
प्रहरीले थापाको अभिव्यक्तिले बैंक तथा वित्तीय क्षेत्रमा त्रास सिर्जना गरेको भन्दै पक्राउ गरिएको जनाएको छ । उनीमाथि अभद्र व्यवहारको मुद्दा दर्ता गर्ने तयारी गरिएको जनाइएको छ ।
