एजेन्सी । स्पेनिस फुुटबल लिग ला लिगा अन्तर्गत रियल मड्रिड बराबरीमा रोकिएको छ । आइतबार राति सम्पन्न खेलमा रियल मड्रिडले रियल बेटिससँग गोलरहित बराबरी खेल्दै अंक बाँडेको हो ।
रियल बेटिसको मैदानमा मड्रिडले बराबरी खेल्दै अंक बाँड्नुपरेपछि उपाधि होडमा रियललाई धक्का पुगेको छ ।
अर्कोतर्फ, गएराति नै भएको खेलमा शीर्षस्थानको बार्सिलोनाले संघर्षपूर्ण जित निकालेको छ । उसले भ्यालेन्सियालाई १–० गोलले पराजित गरेको हो । बार्सिलोनालाई महत्वपूर्ण तीन अंक दिलाउन खेलको १५ औं मिनेटमा राफिन्हाले निर्णायक गोल गरे ।
खेलको ५९ औं मिनेटमा रोनान्ड अराओले रातो कार्ड खाँदै मैदानबाट बाहिरिएपछि बार्सिलोना १० खेलाडीमा समेटिएको थियो ।
यो नतिजासँगै बार्सिलोनाको २४ खेलबाट ६२ अंक छ । पराजित भ्यालेन्सिया समान खेलबाट २३ अंकसहित १९ औं स्थानमा रहेको छ । यस्तै, रियल मड्रिड ५३ अंकसहित दोस्रो स्थानमा रहँदा रियल बेटिस ४१ अंकका साथ पाँचौं स्थानमा छ ।
