एजेन्सी । कोपा डेल रे फुटबल प्रतियोगिता अन्तर्गत बार्सिलोनाले जित निकालेको छ । गएराति भएको सेमिफाइनलको पहिलो लेगमा बार्सिलोनाले चिर प्रतिद्वन्द्वी रियल मड्रिडलाई १–० गोलले पराजित गरेको हो ।
रियल मड्रिडको घरेलु मैदान सान्टियागो बर्नबेउमा भएको एल क्लासिकोमा बार्सिलोनाका लागि विजयी गोल भने उपहारस्वरुप पाएको थियो । खेलको २६ औं मिनेटमा रियलका एडर मिलिसाओले आत्मघाती गोल गरेका हुन् ।
बार्सिलोनाका केसेईले प्रहार गरेको बललाई रियलका गोलकिपर कोर्तुआले खुट्टाले बचाउ गरेपनि फर्किएको बल मिलिसाओलाई लागेर आत्मघाती गोल हुन पुग्यो । ४० औं मिनेटमा रियलले गोल गर्ने अवसर पाएको थियो ।
तर, कार्भाहालको प्रहार आकाशियो । ७२ औं मिनेटमा केसेईले प्रहार गरेको बललाई आफ्नै टिमका अन्सु फातीले छेक्न पुगे । उनले नछेकेको अवस्थामा उक्त बल गोलमा परिणत हुने सम्भावना थियो ।
अब यी दुई टोलीबीचको सेमिफाइनल अन्तरगत नै दोस्रो लेग अप्रिल ६ मा बार्सिलोनाको घरेलु मैदान क्याम्प नोउमा हुनेछ ।
