काठमाडौँ । राष्ट्रपतिको आसन्न निर्वाचनमा उम्मेदवार बन्नुभएका नेपाली कांग्रेसका वरिष्ठ नेता रामचन्द्र पौडेलले आफूलाई मत माग्दै सांसदहरुलाई पत्र पठाउनुभएको छ । आफ्नो लेटरप्याडमा उहाँले सबै सांसदहरुलाई सम्बोधन गरी पत्र लेखेर मत माग्नुभएको हो ।
बिहीबार नेपाली कांग्रेस र नेकपा (माओवादी केन्द्र) सहित आठ दलले काठमाडौँमा संघीय सांसदका लागि राखेको अभिमुखीकरण कार्यक्रममा नेता पौडेलले आफूले लोकतान्त्रिक गणतन्त्र र समावेशी लोकतन्त्र संस्थागत गर्ने गर्ने प्रतिबद्धता व्यक्त गर्नुभयो ।
उहाँले भन्नुभयो, “सबै धर्म संस्कृति, जात वर्ग लिंग र समुदायको अधिकारको प्रत्याभूति रहेको वर्तमान संविधानको अक्षर र मर्मको पालना गर्दै परिवर्तनको जगेर्ना गर्ने अठोटका साथ नेपाल राष्ट्रको राष्ट्रपतिको गरिमामय पदको लागि उम्मेदवारका रुपमा उपस्थित छु । नेपाली जनताका प्रिय प्रतिनिधि तपाईंको अमूल्य मतको अपेक्षा गरेको छु ।”
