काठमाडौँ । नेकपा (एकीकृत समाजवादी)का अध्यक्ष माधव कुमार नेपालले एमालेसहितको राष्ट्रिय सरकार बन्नुपर्ने बताएका छन् ।
धनुषामा प्रदेशस्तरीय पार्टीको प्रशिक्षण कार्यक्रमका लागि पुगेका उनले पत्रकारहरुसँग कुराकानी गर्दै यस्तो बताएका हुन् । सरकार पुनर्गठनबारे छलफल नभएको बताउँदै एमालेलाई सरकारबाट किन निकाल्ने भन्दै उनले प्रश्न समेत गरे ।
एमाले नेताहरुले तपाईलाई राष्ट्रपतिको अवसर पाएर ठूलो अवसर गुमाउनुभयो भन्दैछन् भन्ने प्रश्नमा नेपालले भने, ‘मैले नेपाली कांग्रेस र माओवादीलाई धोखा दिएको भए र सबै खालको जोखिम मोलेको भए पक्कै पनि हुन सक्थ्यो । मैले कांग्रेस र माओवादीलाई धोखा दिनु र राष्ट्रपति पदको निम्ति मरिहत्ते गर्ने काम गर्नु उचित ठानिनँ ।’
