काठमाडौँ । प्रहरीले हुन्डी कारोबार गरेको आरोपमा एक जनालाई पक्राउ गरेको छ ।
काठमाडौँ उपत्यका अपराध अनुसन्धान कार्यालयले भारत हिमाञ्चल प्रदेश घर भई काठमाडौँ महानगरपालिका–१४ कुलेश्वर बस्ने ४९ वर्षीय विजयकुमार गुप्तालाई गत सोमबार पक्राउ गरेको हो ।
उनी कुलेश्वरस्थित माँ चामुण्डा फ्रुट सेन्टरका सञ्चालक हुन् । उनीबाट प्रहरीले ५७ लाख नगद र १४ लाख ८० हजार बराबरको चेक बरामद गरेको प्रहरीले जनाएको छ ।
उनीमाथि नेपाल राष्ट्र बैंक ऐन, २०५८ को दफा ९५ बमोजिम अनुसन्धान गर्न जिल्ला प्रहरी परिसर टेकूमा पठाइएको छ । उनले फलफूल व्यवसाय चलाएर लामो समयदेखि हुन्डी कारोबार गर्दै आएको खुलेको छ ।
उनलाई प्रहरीले २०७५ साल साउन ७ गते दुई लाख भारतीय रुपैयाँ र ३१ लाख नेपाली रुपैयाँसहित पक्राउ गरेको थियो । थप अनुसन्धानको लागि उनलाई राजस्व अनुसन्धान विभाग पुल्चोक पठाइएको थियो प्रहरीले जनाएको छ ।
