काठमाडौँ । प्रहरीले नयाँ बसपार्कस्थित ल्होत्से मलमा गत सोमबार साँझ भएको लुटपाटमा संलग्न रहेको आरोपमा थप एक जनालाई पक्राउ गरेको छ ।
काठमाडौँ उपत्यका अपराध अनुसन्धान कार्यालय मिनभवनबाट खटिएको टोलीले आरोपित नुवाकोट सूर्यगढी गाउँपालिका–४ बरपाटे स्थायी घर भई हाल नेपालटार बस्दै आएका २९ वर्षीय सरोज पौडेललाई बिहीबार बसपार्कबाट पक्राउ गरेको हो ।
पौडेलको साथबाट विभिन्न ब्रान्डका मोबाइल सेटसमेत बरामद गरिएको छ । पौडेललाई चोरीसम्बन्धी कसुर मुद्दामा थप अनुसन्धान तथा कारबाहीको लागि शुक्रबार प्रहरी वृत्त महाराजगन्ज पठाइएको अपराध अनुसन्धान कार्यालयले जनाएको छ । उक्त घटनामा संलग्न १५ जनालाई प्रहरीले पक्राउ गरिसकेको छ ।
