काठमाडौंः रसुवा भन्सार कार्यालयका तत्कालीन भन्सार अधिकृत दानबहादुर केसीले गैरकानूनी रुपमा सम्पत्ति आर्जन गरेको आरोप लगाउँदै अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ ।
अख्तियारले निज केसीले आफू सरकारी सेवामा रहँदा गरेको आम्दानी भन्दा बढी खर्च भएको र त्यसको वैधानिक स्रोत पुष्टी हुन नसकेको जनाएको छ । अनुसन्धानमा केसीले २०४३ सालदेखि २०७८ सम्मको जागिरको अवधिमा कूल रु. ३ करोड ५१ लाख १६ हजार आम्दानी गरेका भएपनि रु. ५ करोड ६१ लाख २६ हजार खर्च भएको देखिएको थियो ।
आयोगले निज केसीले पुष्टी हुन नसकेको रु. २ करोड १० लाख १० हजार बढी गैरकानुनी रुपमा आर्जन भएको र त्यसको आय पुष्टी हुन नसकेको जनाउँदै विशेष अदालतमा मुद्दा दायर गरेको हो ।
प्रचलित कानूनबमोजिम सार्वजनिक पद धारण गरेको राष्ट्रसेवक कर्मचारीले पदमा बहाल रहँदाका बखत अमिल्दो तथा अस्वभाविक सम्पत्ति आर्जन गर्नुका साथै मनासिब कारणबिना अमिल्दो र अस्वभाविक उच्च जीवनस्तर यापन गरेको पुष्टि हुन आएको पनि आयोगका प्रवक्ता श्याम प्रसाद भण्डारीले बताउनु भएको छ ।
आयोगले अधिकृत केसीले जाँच अवधिमा गैरकानूनी रुपमा आर्जन गरेको सम्पत्ति निजको नाममा रहेको बैङ्कमा मौज्दात रकम र श्रीमती सुसिला पण्डितको नाममा हाल कायम रहेको आंशिक श्रोत नपुगेको हिस्साको र जाँच अवधि पछि खरिद गरेका सम्पत्तिबाट समेत साविक भ्रष्टाचार निवारण ऐन बमोजिम जफत र असुल उपर गर्न मागदाबी गरेको छ ।
