काठमाडौँ । यही फागुन १ गते काठमाडौँको बालाजुस्थित नयाँबसपार्कको लोत्से मलमा आगजनी, तोडफोड र लुटपाट गर्ने मुख्य व्यक्तिहरुलाई पक्राउ गरिएको छ ।
काठमाण्डौ उपत्यका अपराध अनुसन्धान कार्यालयका अनुसार काठमाडौँ महानगरपालिका–१६ माछापोखरी चोकस्थित नेपाल यातायात स्वतन्त्र मजदुर संगठन, नेपाल यातायात मजदुर संघ र अखिल नेपाल यातायात मजदुर संघका यातायात व्यवसायीहरुले ट्राफिक कारवाहीको विषयलगायत विभिन्न १० बुँदे माग राखी गरेको विरोध प्रदर्शनका क्रममा भएको उक्त घटनाका मुख्य व्यक्तिहरुलाई पक्राउ गरिएको हो ।
विरोध प्रदर्शनका क्रममा प्रदर्शनकारीहरूले प्रहरी भ्यान, प्रहरी विट, ट्राफिक आईल्याण्ड तोडफोड तथा आगजनी गरेको र ल्होत्से मलमा तोडफोड गरी भित्र प्रवेश गरी मोवाईल पसलमा लुटपाट समेत भएको थियो ।
काठमाण्डौ उपत्यका अपराध अनुसन्धान कार्यालयको टोलीले घटनामा संलग्नलाई फागुन ३ गते काठमाडौँका विभिन्न स्थानबाट पक्राउ गरी आपराधिक उपद्रव गर्न नहुने कसूर र चोरीसम्बन्धी कसुर मुद्दामा थप अनुसन्धान तथा कारवाहिको लागि बिहीबार प्रहरी वृत्त, बालाजु र महाराजगञ्ज पठाइएको जानकारी दिएको छ ।
