धनगढी । नेकपा (एकीकृत समाजवादी) का सम्मानित नेता झलनाथ खनालले आवश्यक परे आफ्नो पार्टीले पनि राष्ट्रपतिमा उम्मेदवार उठाउन सक्ने बताउनुभएको छ ।
मंगलबार प्रेस संगठन कैलालीले धनगढीमा आयोजना गरेको पत्रकार सम्मेलनमा उहाँले राजनीतिक दलहरुबीच सहमतिका आधारमा आवश्यक भएको अवस्थामा एकीकृत समाजवादीले पनि राष्ट्रपतिमा उम्मेदवार दिनसक्ने बताउनुभएको हो ।
राष्ट्रपतिमा तपाईंको पनि चर्चा चलेको छ नि भन्ने पत्रकारको जिज्ञासामा उहाँले भन्नुभयो, “चर्चा गरिदिएकामा धन्यवाद ।”
सबै राजनीतिक दलले सुझबुझपूर्ण ढंगले राष्ट्रपति निर्वाचनको हकमा निर्णय लिनुपर्ने उहाँको भनाइ थियो । राष्ट्रपति निर्वाचन भनेको महत्त्वपूर्ण एजेन्ड हो भन्दै उहाँले भन्नुभयो, “यसमा सबै राजनीतिक दलले सुझबुझ र बडो दूरदर्शिताका साथ संविधानको मर्म, हामीले स्थापित गरेको लोकतान्त्रिक मूल्य, मान्यताका साथ राम्रो व्यक्तित्वलाई पदमा पुर्याउनुपर्छ ।”
नेता खनालले अहिले नै सत्ता गठबन्धन भत्किने सम्भावना नरहेको टिप्पणी गर्नुभयो । अहिले गठबन्धन भत्किने र नयाँ गठबन्धन बन्ने त्यस्तो कुनै सम्भावना नदेखिएको उहाँको भनाइ थियो ।
