काठमाडौँ । यही फेब्रुअरी महिनाको पहिलो साता अन्तर्राष्ट्रिय विकासका लागि अमेरिकी नियोग (युएसएआइडी) प्रमुख सामन्था पावर नेपाल आउने हुनुभएको छ । बुधबार विज्ञप्ति जारी गर्दै युएसएआइडीले पावरले नेपालको भ्रमण गर्ने बताएको छ । यद्यपि उहाँ कुन मितिमा नेपाल आउने भन्नेबारे विज्ञप्तिमा केही उल्लेख गरिएको छैन ।
नेपालमा नयाँ सरकार बनेपछि कुनै पनि मुलुकबाट हुन लागेको यो उच्च तहको भ्रमण हुनेछ । यसअघि सन् २००२ मा अमेरिकाका तत्कालीन विदेशमन्त्री कोलिन पावेलले नेपालको औपचारिक भ्रमण गर्नुभएको थियो । पावरलाई क्याबिनेटस्तरकी उच्च अधिकारी मानिन्छ । उहाँ राष्ट्रिय सुरक्षा परिषद्को सदस्यसमेत हुनुहुन्छ ।
छोटो अवधिमै अमेरिकाबाट हुन लागेको यो उच्चस्तरको भ्रमण हुन लागेको हो । यसअघि अमेरिकी राजनीतिक मामिला उपमन्त्री भिक्टोरिया नुल्यान्डले हालै नेपालको भ्रमण गरी फर्किसक्नुभएको छ ।
नेपाल भ्रमणमा रहँदा पावरले नेपालका नागरिक समाजका अगुवाहरु, सामुदायिक समूहहरु, विद्यार्थी, व्यवसायी र सरकारी अधिकारीहरुसँग भेट्ने कार्यक्रम रहेको युएसएआइडीले जनाएको छ । भेटमा नेपाललाई थप लोकतान्त्रिक समृद्ध, समावेशी र लचिलो मुलुक बनाउने प्रयास र उपलब्धिहरुबारे छलफल हुनेछ ।
विज्ञप्तिअनुसार पावरले नेपाल र नेपाल सरकारसँग आफ्नो संलग्नता बढाउने युएसएआइडीको प्रतिबद्धता उजागर हुनेछ । विज्ञप्तिमा संघीयता, सामाजिक समावेशीकरण, नागरिक समाज, मिडिया स्वतन्त्रतामा लोकतान्त्रिक लाभहरुलाई सुदृढ बनाउन गति निर्माण गर्न नयाँ प्रयासहरुको पावरले घोषणा गर्ने उल्लेख छ ।
सन् २०२१ मे ३ बाट युएसएआइडीको जिम्मेबारी सम्हालेकी पावरले नेपाल सरकार र जनतासँगको अमेरिकाको ७५ वर्षभन्दा लामो साझेदारीलाई जोड दिने बताइएको छ ।
