काठमाडौँ । आगामी शैक्षिक सत्रका लागि कक्षा १ देखि ५ सम्मका पाठ्यपुस्तकको छपाइको जिम्मा निजी क्षेत्रले पाउने भएको छ । यसअघि कक्षा १ देखि ३ सम्मका पाठ्यपुस्तकको छपाइको जिम्मा पाएका निजी क्षेत्रले अबदेखि कक्षा ४ र ५ को पनि पाठ्यपुस्तक छाप्न पाउने भएका छन् ।
शिक्षा, विज्ञान तथा प्रविधिमन्त्रालयले गरेको निर्णयका आधारमा निजी क्षेत्रले कक्षा १ देखि ५ सम्मका पाठ्यपुस्तक छपाइ गर्न पाउने सूचना पाठ्यपुस्तक विकास केन्द्रले जारी गरेको छ । केन्द्रले पुस्तक छपाइका लागि निजी क्षेत्रलाई सूचीकृत हुन सूचना जारी गरेको हो ।
सूचनाअनुसार निजी मुद्रक तथा वितरकहरुले कक्षा १ देखि ५ सम्मका चार रङका पाठ्यपुस्तक र अन्य पाठ्यसामग्री छपाइ गरी विक्री वितरण गर्नुपर्नेछ । यसका लागि निजी क्षेत्रले केन्द्रले तयार गरेको प्रिन्ट रेडी कपी (पीआरसी) का आधारमा पाठ्यपुस्तक छाप्नुपर्नेछ ।
यसअघि जनक शिक्षा सामग्री केन्द्र लिमिटेडले सोही आधारमा पाठ्यपुस्तक छाप्ने गरेको थियो । प्रत्येक वर्ष पाठ्यपुस्तकको अभाव हुने समस्या समाधान गर्न निजी क्षेत्रलाई पनि पाठ्यपुस्तक छपाइको जिम्मेबारी दिइएको बताइएको छ ।
