बिर्तामोड । कम्बोडिया र थाइल्यान्ड सीमा नजिकैको एक क्यासिनोमा भीषण आगलागीमा ज्यान गुमाएका विर्तामोड–१ का निराकार पाण्डेको शव आज बिर्तामोड ल्याईएको छ । शव आएसँगै सबैलाई स्तब्ध बनाएको छ ।
युवा व्यवसायी निराकार विर्तामोड–१ का वडाध्यक्ष अग्नि पाण्डेका छोरा हुन् । गत पुस १४ गते निराकारको मृत्यु भएको थियो । विदेशबाट विभिन्न प्रक्रिया पुर्याएर शव ल्याउन ढिला भएको हो ।
निराकारको शव ल्याउन नेपाल सरकारले सहयोग गरेको छ । प्रधानमन्त्री पुष्पकमल दाहाल प्रचण्डले निराकारको मृत्युमा गहिरो शोक व्यक्त गर्दै शव ल्याउन सरकारले सहयोग गर्ने बताउनुभएको थियो ।
विर्तामोडस्थित निवासमा शव आउने खबर थाहा पाएर पाण्डे निवासमा विहानैदेखि हजारौं शुभचिन्तक भेला भएका थिए ।
शुक्रवार साँझ पाण्डेको शव कम्बोडियाबाट नेपाल ल्याइएको थियो । परिवार स्रोतका अनुसार आज दिउँसो निराकारको कनकाई माईमा अन्त्येष्टि गरिने छ ।
