काठमाडौँ । नेपाली कांग्रेसका सांसद रामहरि खतिवडाले हत्या अभियोग लागेका सांसदले सभामुख निर्वाचन प्रक्रियामा सहभागी हुन नपाउने बताउनुभएको छ । प्रतिनिधिसभाको आजको बैठकमा विशेष समय लिएर बोल्दै उहाँले हत्या अभियोग लागेका सांसद लक्ष्मी महतो कोइरीले सभामुखको निर्वाचनमा मतदान गर्न नपाउने व्यवस्था गरेर मात्रै संसद्को थप कारबाही अगाडि बढाउन माग गर्नुभयो ।
उहाँले भन्नुभयो, “अहिले सभामुखको निर्वाचन हुँदैछ । आज सभामुखको निर्वाचन हुने बेलामा हत्या अभियोग लागेका सांसद्हरु पनि यहीँभित्र छन् भन्ने सुनिन आएको छ । म गृहमन्त्रीज्यूलाई अनुरोध गर्न चाहन्छु हामी चिन्दैनौँ उहाँलाई । यदि उपस्थित हुनुहुन्छ भने उहाँलाई मतदान प्रक्रियामा भाग लिन पाउने÷नपाउने निर्क्योल गरेर मात्रै सभा सञ्चालन गरियोस् भन्ने माग गर्न चाहन्छ ।”
त्यसपछि सभामुखको भूमिका निर्वाह गर्नुभएका ज्येष्ठ सदस्य पशुपति शम्शेर जबराले नेकपा ९एमाले० का सांसद सुवास नेम्वाङलाई देवराज घिमिरेलाई सभामुख बनाइयोस् भन्ने प्रस्तावको पक्षमा बोल्न समय दिनुभयो ।
आज सभामुख चयनका लागि कार्यतालिका रहेको छ ।
मधेस आन्दोलनका बेला सशस्त्र प्रहरीका सहायक निरीक्षक थमन विकको हत्यासम्बन्धी मुद्दामा उच्च अदालतबाट कोइरीलाई थुनामा राख्न आदेश सुनाइएको थियो ।
हत्या अभियोगमा फरार रहेका सांसद कोइरीले प्रहरीको फरार सूचीमै रहेको बेला महोत्तरी–१ बाट गत पुस ७ गते प्रतिनिधिसभा सदस्यको सपथ लिनुभएको थियो । उहाँ अहिले पनि निर्बाध संसद् आउजाउ गरिरहनुभएको छ ।
