काठमाडौं । बलिउड अभिनेत्री सुरेखा सीकरी (दादिसा) को आज निधन भएको छ। उनको ७५ वर्षको उमेरमा हृदयघातका कारण शुक्रवार बिहान निधन भएको उनको म्यानेजरले बताएका हुन् ।
सुरेखा केही महिनादेखि बिरामी थिइन्। गत वर्ष उनलाई मस्तिष्कघात पनि भएको थियो।
सुरेखाले सन् १९७८ मा ‘किस्सा कुर्सीका’ फिल्मबाट अभिनय यात्रा सुरु गरेकी थिइन्। उनले ‘तमस’ (सन् १९८८), मम्मो (सन् १९९५) र ‘बधाई हो’ (सन् २०१८) बाट सहायक अभिनेत्रीका लागि राष्ट्रिय पुरस्कार समेत पाएकी थिइन्।
उनी अभिनित फिल्म ‘किस्सा कुर्सीका’ सन् १९७८ मा इन्दिरा गान्धीमाथि बनाइएको थियो। अमृत नाहटाको निर्देशन रहेको उक्त फिल्ममाथि सञ्जय गान्धीले संकटकालीन समय (१९७५(७७) मा प्रतिबन्ध लगाएका थिए। उक्त फिल्म पछि मात्रै रिलिज भएको थियो।
टेलिसिरियल ‘बालिका वधु’मा उनले दादीसा (हजुरआमा) को भूमिका निभाएकी थिइन्। जुन भूमिकाबाट उनले निकै चर्चा बटुलेकी थिइन्।
