काठमाडौं । नेपाल टी–२० लिग अन्तर्गत आज भएको खेलमा काठमाडौं नाईट्सले जनकपुर रोयल्सलाई १८१ रनको लक्ष्य दिएको छ । टियु मैदानमा टस हारेर पहिले ब्याटिङ गरेको काठमाडौंले २० ओभरमा ६ विकेट गुमाएर १ सय ८० रन बनाएको हो ।
काठमाडौंका लागि सुनाम गौतमले ४७ बलमा ६२ रनको अर्धशतकिय ईनिङ खेले । यस्तै रायन बर्लले पनि ४० बलमा ४ चौका र ३ छक्कासहित ६१ रनको अर्धशतकीय ईनिङ खेले । एलेक्स ब्लेक भने २० रनमा आउट भए ।
यस्तै , अजमतुल्लाह उमजाईले १० रन जोडे भने लोकेश बम ७ रनमा अविजित रहे । कप्तान ज्ञानेन्द्र मल्ल भने यस लिगमा तेस्रो पटक डगआउट भए ।
जनकपुरको तर्फबाट जितेन्द्र मुखियाले २ विकेट लिए । शरफुदिन असरफ र कप्तान ट्राभोन ग्रिफिथले भने समान १/१ विकेट लिए ।
जनकपुर ५ खेलमा ८ अंकका साथ अंक तालिकाको दोस्रो स्थानमा रहेको छ भने काठमाडौं चार खेलमा २ खेल जितेर ४ अंक सहित तालिकाको तेस्रो स्थानमा रहेको छ।
जारी प्रतियोगिताको पहिलो भेटमा काठमाडौंले जनकपुरलाई ५३ रनले हराएको थियो । आज हुने दोस्रो खेलमा विराटनगर सुपर किङ्स र लुम्बिनी अलस्टार्सबीच प्रतिस्पर्धा हुँदैछ ।
यस प्रतियोगिताको फाईनल खेल २७ गते हुनेछ । यस लिगमा काठमाडौं नाइट,पोखरा एभेन्जर्स,फार वेस्ट युनाईटेड,जनकपुर रोयल्स,विराटनगर सुपर किंग्स र लुम्बिनी अल स्टार रहेका छन् ।
