काठमाडौंः नेपाल राष्ट्र बैंकले कुमारी बैंक र एनसिसी बैंकबीच मर्जरको कार्य पूरा भएको जनाउँदै आगामी पुस १७ गते आइतबारदेखि कुमारी बैंकका नामबाट एकीकृत कारोबार गर्ने बताएको छ ।
राष्ट्र बैंकले आज प्रकाशन गरेको सूचनामा राष्ट्र बैंकको संचालक समितिको निर्णय अनुसार कुमारी बैंक र नेपाल क्रेडिट एन्ड कमर्स (एनसिसी) बैंक एक आपसमा गाभिई साविकका संस्थाहरुको सम्पूर्ण सम्पत्ति तथा दायित्व गाभिएपश्चात् बन्ने संस्थामा सर्नेगरी दुबै संस्थाबाट संचालन हुँदै आएको सम्पूर्ण वित्तीय कारोबार एकीकृत रुपमा यही पुस १७ गते आइतबारदेखि कुमारी बैंकको नामबाट संचालन गर्ने उल्लेख छ ।
नेपाल राष्ट्र बैंकले बैंक तथा वित्तीय संस्थाहरुलाई मर्जरका लागि प्रोत्साहित गरेसँगै विभिन्न बैंक र वित्तीय संस्थाहरु मर्जर भइरहेका छन् । पछिल्लो समय ग्लोबल आइएमई बैंक र बैंक अफ काठमाडौं पनि मर्ज भई एकीकृत कारोबार सुरु भइसकेको छ ।
साथै नेपाल इन्भेस्टमेन्ट बैंक, नबिल बैंक, हिमालयन बैंक, मेगा बैंक, नेपाल बंगलादेश बैंकहरु पनि विभिन्न बैंकसँग मर्जरको प्रकृयामा रहेका छन् ।
