काठमाडौँ । राष्ट्रिय स्वतन्त्र पार्टी (रास्वपा) का अध्यक्ष रवि लामिछाने उपप्रधानमन्त्रीसहित गृहमन्त्री बन्नुहुने भएको छ ।
आज अपराह्न ४ बजे नवनियुक्त प्रधानमन्त्री पुष्पकमल दाहाल प्रचण्डले पद तथा गोपनीयताको शपथ लिएपछि लामिछानेले शपथ लिनुहुनेछ ।
लामिछानेले नयाँ बानेश्वरस्थित संघीय संसद् भवनमा आजै भएको सत्ता गठबन्धनको बैठकमा उपप्रधानसहित गृह मन्त्रालय पाउनुपर्ने दाबी गर्नुभएको थियो । उहाँले उपप्रधानमन्त्री बन्ने निश्चित भए पनि कुन मन्त्रालय पाउने भन्ने टुंगो लागेको थिएन ।
प्रतिनिधिसभामा २० सिट हासिल गरेको रास्वपा प्रतिनिधिसभामा चौथो ठूलो दल हो भने सत्ता गठबन्धनमा प्रधानमन्त्री प्रचण्ड नेतृत्वको सरकारमा सहभागी तेस्रो ठूलो दल हो ।
