काठमाडौं । एमाले सचिव योगेश भट्टराईले टीकापुर घटनामा दोषी ठहर भई जेल परेका रेशम चौधरीलाई छाड्न सरकारले अध्यादेश ल्याउने निर्णयप्रति विरोध जनाएका छन् ।
भट्टराईले सामाजिक सञ्जाल फेसबुकमा एक स्टाटस लेख्दै गठबन्धन सरकारले सत्ताको लागि व्यवस्थामाथि प्रहार गरेको आरोप लगाएका छन् । उनले गठबन्धन रहेसम्म राजनीतिमा अपराधीकरण र अपराधको राजनीतिकरणमा यस्तै भइराख्ने जिकिर गरेका छन् ।
उनले भनेका छन्, ‘रेशमको नाम, अफ्ताबको काम, राजनीतिमा अपराधीकरण, अपराधको राजनीतिकरण, देश भाँडमा जाओस् कि व्यवस्था बदनाम होस् के मतलब गठबन्धन रहुञ्जेल । यो त कास्टिङ मात्र हो । पूरा सिरिज त आउन बाँकी नै छ !’
आइतबार बसेको मन्त्रिपरिषद्को बैठकले सीके राउत, नेत्रविक्रम चन्द र रेशम चौधरीलगायतका व्यक्तिहरूले नेतृत्व गरेका राजनीतिक समूहका नेता कार्यकर्तालाई रिहा गर्नका लागि अध्यादेश ल्याउने निर्णय गरेको थियो ।
