रुपन्देही । गृहमन्त्री बालकृष्ण खाणविरुद्ध बहुविवाहको उजुरी परेको छ । रुपन्देही निर्वाचन क्षेत्र नं ३ बाट प्रतिनिधिसभा सदस्यका लागि उम्मेदवारी दिनुभएका मन्त्री खाणविरुद्ध बहुविवाह गरेको भन्दै उजुरी दर्ता भएको छ ।
मुख्य निर्वाचन अधिकृतको कार्यालय, रुपन्देही प्रतिनिधिसभा सदस्य निर्वाचन क्षेत्र नं ३ मा उजुरी दर्ता भएको हो । सत्ता गठबन्धनका तर्फबाट नेपाली कांग्रेसले सो क्षेत्रमा उहाँलाई उम्मेदवार बनाएको छ । उहाँको उम्मेदवारी खारेजीको माग गर्दै उजुरी परेको बताइएको छ ।
अधिवक्ता तारा बरालले यसअघि निर्वाचन आयोगमा दर्ता भएको र सम्बन्धित क्षेत्रमा आएर उजुरी दर्ता गरेको जानकार दिइन् । उनका अनुसार गृहमन्त्री खाण बहुविवाहमा संलग्न रहेको पाइएकाले उजुरी दर्ता गरिएको हो ।
“खाणले गृहमन्त्री चलाउँदै गर्दा बहुविवाह गर्ने हजारौँ जेलमा सडाउने काम गर्नुभएको छ, देशकै गृहमन्त्रीले रुपन्देहीमा दिलमाया खाण, काठमाडौँमा मञ्जु खाण नाम दर्ता भएकाले उक्त कुराको पुष्टि हुन्छ”, उनले भनिन् ।
निर्वाचन आयुक्तले सम्बन्धित जिल्लामा दर्ता गरेपछि प्रक्रिया अगाडि बढाइने भनेकाले रुपन्देही क्षेत्र नम्बर ३ स्थित मुख्य निर्वाचन अधिकृतको कार्यालयमा उजुरी दर्ता गराइएको उनले जानकारी दिइन् ।
