काठमाडौँ । अघिल्लो सांसदको पहलमा आएको बजेटको आयव्यय विवरण सार्वजनिक गर्न माग गर्दै ललितपुर निर्वाचन क्षेत्र नं १ का उम्मेदवार डा सचिन घिमिरेले आमरण अनशन सुरु गरेका छन् ।
राष्ट्रिय स्वतन्त्र पार्टीबाट प्रतिनिधिसभामा उम्मेदवारी दिएका घिमिरेले सात सूत्रीय माग राखी गोदावरीको टाखेलमा आमरण अनशन सुरु गरेका हुन् ।
ललितपुर–१ का निवर्तमान सांसद्ले आफ्नो कार्यकालमा बजेट ल्याएर विकास निर्माणको काम गरेको दावी गरेपछि उनको पालामा आएको बजेटको आयव्यय विवरण सार्वजनिक हुनुपर्ने मुख्य माग घिमिरेले राखेका छन् ।
अरुलाई असर नपर्ने गरी शान्तिपूर्णरुपमा आफ्ना माग राख्न पाइने भन्दै घिमिरेले यसलाई उनको निर्वाचनको प्रचारप्रसारको अभियानको एउटा पाटो भनेका छन् । निर्वाचनका क्रममा विभिन्न कुरा थाहा पाएकाले ती विषयलाई उठाई सत्याग्रह सुरु गरेको उनले बताए ।
उनले गोदावरी नगरपालिकामा एक महिनाभित्र बाँदर व्यवस्थापन हुनुपर्ने माग समेत राखेका छन् । ललितपुरको चौघरेका दुई विद्यार्थीले प्राविधिक शिक्षा अध्ययन गरिरहेको र उनीहरुलाई आर्थिक अभाव भएकाले स्थानीय सरकारले उनीहरुको माग पूरा गरिदिनुपर्ने उनको अर्को माग छ ।
घिमिरेले गोदावरी नगरपालिकाका किशोरीहरुलाई अहिले आइरन चक्की बाँड्ने काम भइरहेको र त्यसको जनस्वास्थ्य औचित्य प्रमाणित गर्नुपर्ने मागसमेत राखेका छन् । उनले कोञ्ज्योसोम र माल्टाका दुई रोगीको उपचारको माग गरेका छन् । साथै आश्राङ गाउँका दुई बालबालिकाको आर्थिक अवस्था कमजोर भएकाले उनीहरुको लालनपालन र शैक्षिक व्यवस्थापनको माग गरेका छन् ।
गोदावरीको टाखेल चौतारो नजिकै पिपलको रुखको हाँगाले ट्रान्सफर्मर छोएकाले रुखको हाँगा काट्नुपर्ने उनको अर्को माग छ ।
