काठमाडौँ । ललितपुर–३ मा राष्ट्रिय स्वतन्त्र पार्टीबाट उम्मेदवार बनेकी डा तोसिमा कार्कीको उम्मेदवारी कायम रहने भएको छ । सर्वोच्च अदालतले उनको उम्मेदवारी कायम राख्न यसअघि दिएको अन्तरिम आदेशलाई निरन्तरता दिएको छ ।
तोसिमाको उम्मेदवारी खारेजीको माग गर्दै निर्वाचन आयोगले दिएको निवेदनमाथि सर्वोच्चले सुनुवाई गर्दै उम्मेदवारी कायम राख्ने आदेश दिएको हो ।
न्यायाधीश ईश्वरप्रसाद खतिवडा र तिलप्रसाद श्रेष्ठको संयुक्त इजलासले तोसिमा लाभको पदमा बहाल रहेको भनी मान्न मिल्ने नदेखिएको निष्कर्ष निकालेको हो ।
निर्वाचन आयोगले नेपाल मेडिकल काउन्सिलको सदस्य रहेकाले तोसिमाले लाभको पद लिएको र त्यस्तो व्यक्ति उम्मेदवार बन्न अयोग्य हुने भन्दै उनको उम्मेदवारी खारेज गरेको थियो । सो विरुद्ध कार्की सर्वोच्च पुगेकी थिइन् ।
कार्कीको निवेदनमा सुनुवाई गर्दै यसअघि न्यायाधीश कुमार चुडालको इजलासले उम्मेदवारी कायम गर्न अन्तरिम आदेश दिएको थियो ।
अन्तरिम आदेश खारेजको माग गर्दै ९भ्याकेट० निर्वाचन आयोग सर्वोच्च अदालत गएको थियो । सोमबार सर्वोच्च अदालतले पुरानै आदेशलाई निरन्तरता दिएको हो ।
