काठमाडौँ । नेपाली कांग्रेसका नेता प्रकाशमान सिंहले काठमाडौँ क्षेत्र नं १ को सुकुम्बासी समस्या समाधान गर्ने बताउनुभएको छ ।
प्रतिनिधिसभा सदस्यका लागि सत्ता गठबन्धनका तर्फबाट नेपाली कांग्रेसका उम्मेदवारसमेत रहनुभएका नेता सिंहले सुकुम्बासी समस्या समाधानका लागि भूमि आयोग बनेको र त्यसले दिने प्रतिवेदनका आधारमा समस्याको समाधान निकाल्ने बताउनुभयो ।
उहाँका अनुसार भूमि आयोगले काम सुरु गरिसकेको छ । निर्वाचन आयोगले निर्वाचनको समयमा काम रोक्नु भनेकाले अहिले काम रोकिएको हो । आइतबार बिहान थापाथलीस्थित बागमती किनारको सुकुम्बासी बस्तीमा आयोजित कार्यक्रममा उहाँले आयोगको प्रतिवेदन आइसकेपछि त्यसको अध्ययन गरेर स्थायी समाधान निकालिने स्पष्ट गर्नुभयो ।
उहाँले जबरजस्ती नभई भूमिहीनको चित्त बुझाएर मात्र समस्या समाधान गरिने उल्लेख गर्नुभयो ।
