काठमाडौँ । नेकपा एमालेका अध्यक्ष एवं पूर्वप्रधानमन्त्री केपी शर्मा ओली शुक्रबार मध्यरातमा ठमेलस्थित नाइटक्लब लर्ड अफ द ड्रिंक्स (एलओडी) पुगेका छन् ।
मंसिर ४ मा हुने निर्वाचन नजिकिँदै गर्दा उनी आफ्नो पार्टी नेकपा एमालेको चुनावी र्याप गीत सार्वजनिक गर्न एलओडी पुगेका हुन् ।
उनको बारेमा बनाइएको र्याप गीत युट्युबमा भने एक हप्ताअघि नै सार्वजनिक भइसकेको छ । अध्यक्ष ओलीले युवाहरूमाझ लोकप्रिय रहेको र्याप गीत सार्वजनिक गर्न आफू एलओडी पुगेको उल्लेख गरेका छन् । साथै ओलीले फेसबुकमा तस्बिरहरू पोस्ट गरेका छन् ।
‘सहर सहरमा ओली’ नाम दिइएको उक्त गीतमा ओलीले नागरिकता विधेयकमा अडान लिएको, अतिक्रमित भूभाग समेट्दै नक्शा जारी गरेको, राष्ट्रवादी नेता भएको जस्ता विषय गीतमा समेटिएको छ । यस्तै, शुक्रबार नै ‘केपी बा’ नामको अर्को र्याप गीत पनि सार्वजनिक भएको छ ।
