काठमाडौँ । नेपाली कांग्रेसका महामन्त्री एवं काठमाडौँ क्षेत नं ४ का प्रतिनिधिसभा सदस्यका उम्मेदवार गगन थापाले कपनमा खहरेको समस्या समाधान गरेरै छाड्ने प्रतिबद्धता व्यक्त गर्नुभएको छ ।
बूढानीलकण्ठको वडा नं १० मा घरदैलो प्रचारका क्रममा उहाँले खहरे समस्या दुई भित्रमा समाधान नगरे फेरि मत माग्न नआउने वाचा गर्नुभयो । “दुई वर्षभित्र यो खहरेको समस्या समाधान गर्न सकिनँ भने अर्कोपटक तपाईंहरुसँग मत माग्न आउँदिन ।”
उहाँले घर अगाडिको ढल र फोहोरमात्रै नभएर मुलुककै अगाडि थुप्रिएको फोहोरलाई सफा गर्ने उद्देश्यसहित मत माग्न आएको बताउनुभयो ।
पानी पर्नेबित्तिकै सामान्यतया काठमाडौँको कपन क्षेत्रमा बाढी आउने गर्दछ । अझ बर्सातको बेला त आउने बाढीले कपनबासीलाई हैरानी नै दिएको छ । दीर्घकालीन समस्या समाधान गर्ने उद्देश्यले कांग्रेस महामन्त्री थापाले ‘धोबीखोला कोरिडोर कपन–बूढानीलकण्ठ डुबान नियन्त्रण आयोजना’ को प्रस्ताव अघि बढाउनुभएको थियो ।
उहाँको सो प्रस्तावलाई मन्त्रिपरिषद्ले स्वीकृतसमेत गरेको छ । बाढी नियन्त्रणका लागि चरण–चरण गरी एक अर्ब २५ करोड रुपैयाँभन्दा बढी बजेट विनियोजन भइसकेको तर स्थायी समाधान अझै हुन सकेको छैन ।
