काठमाडौंः संघीयता कार्यान्वयन पछिको दोस्रो संसदीय निर्वाचनको सङ्घारमा मुलुक आइपुगेको छ । अर्थात् आगामी मंसिर ४ गते प्रतिनिधि सभा र प्रदेश सभाका लागि मतदान हुँदैछ । चुनावको मिति नजिकिएसँगै प्रमुख दलका शीर्ष नेताहरु र स्वतन्त्र उम्मेदवारहरु चुनावी प्रचारमा दिनरात खटिन थालेका छन् ।
जीवन्त लोकतन्त्रमा चुनाव आफैंमा एउटा महाउत्सव हो । जनताले आफूलाई मन परेका उम्मेदवार छान्ने अवसर पाउँछन् । त्यसैले यस्ता चुनावलाई भयरहित, स्वतन्त्र र निष्पक्ष गरिनु अपरिहार्य छ । जनताले आफ्नो अभिमत कुनै प्रलोभन वा भयका बीचमा व्यक्त गर्न नपरोस् भन्नेतर्फ समग्र राजनीतिक नेतृत्व, शासन प्रणाली र निर्वाचन आयोग समेत राज्यका सबै अवयवले काम गर्नु पर्दछ । कुनै कारणवश अयोग्य व्यक्तिले छलछाम मार्फत् चुनाव जिते त्यो मुलुकका लागि प्रत्युत्पादक हुनेमा कुनै शंका छैन ।
चुनावप्रति जनताको मनोविज्ञान केही अघिसम्म खासै उत्साहजनक नरहेको विभिन्न अध्ययनहरुले देखाएकै हुन् । तर जति चुनाव नजिकिँदो छ जनतामा विस्तारै चुनावप्रति एक किसिमको आकर्षण देखा पर्न थालेको छ । दलहरुका विगत पाँच वर्षका कार्यशैलीबाट निराश भएर भोट नदिने भन्दै बसेका व्यक्तिहरुको मनस्थिति पनि विस्तारै बदलिन थालेको आभास हुन थालेको छ । यो निकै सकारात्मक कुरा हो ।
चुनावी सरगर्मी ल्याउन प्रमुख दलका नेताहरु र स्वतन्त्र उम्मेदवारहरुले निकै पहल गरेको देखिन थालेको छ । काठमाडौं महानगरपालिका र धरान उपमहानगरपालिकामा स्वतन्त्र उम्मेदवारहरु विजयी भएपछि देशैभरि खैलाबैला मच्चिएको थियो । अहिले फेरि संघ र प्रदेश चुनावमा पनि एउटा समूह स्वतन्त्र उम्मेदवारका रुपमा मैदानमा उत्रिसकेको छ । यस्तो अवस्थामा चुनावी सरगर्मी केही बढ्नु स्वाभाविकै हो ।
अरु त, प्रधानमन्त्री एवं नेपाली कांग्रेसका सभापति शेर बहादुर देउवाले आफ्नै गृहजिल्ला डडेल्धुरामा शृंखलाबद्ध चुनावी सभा गर्नु भएको छ । उहाँमाथि स्वतन्त्र र बागीको निकै ठूलो दबाब छ । अर्को प्रमुख दल नेकपा एमालेका अध्यक्ष केपी शर्मा ओली झापामा राप्रपासँग तालमेल र चुनावी सभा गरेर अहिले देश दौडाहामा निस्कनु भएको छ । दार्चुलाबाट चुनावी सभा शुरु गर्नु भएका उहाँ काठमाडौं, धादिङ र कास्की पुग्नु भएको छ । अर्थात् उहाँ आगामी सरकार एमालेको नेतृत्वमा बनाएरै छाड्ने अभियानमा देशव्यापी दौडाहामा हुनुहुन्छ ।
अर्को दल, नेकपा माओवादी केन्द्रका अध्यक्ष पुष्पकमल दाहाल प्रचण्ड गोरखा र सेरोफेरोका जिल्लामा व्यस्त देखिनु भएको छ । तर अन्यत्रका कार्यक्रममा उहाँ खासै देखा पर्नु भएको छैन ।
बरु, स्वतन्त्र पार्टी खोलेर चुनावी मैदानमा डटिरहनु भएका ऋषि लामिछाने मोरङ, चितवन, सुर्खेत गर्दै देशभर सक्रियतापूर्वक खटिरहनु भएको छ ।
अहिले प्रमुख दलले सार्वजनिक गरेका चुनावी घोषणापत्रमा जनताको खासै रुचि देखिन्न । नेताहरु आफ्ना चुनावी एजेन्डालाई थाँती राखेर एकअर्कालाई गालीगलौज गर्ने ध्याउन्नमा लागेका छन् । गठबन्धन र इतर गठबन्धन जेसुकै भने पनि उनीहरु आगामी सरकार एक्लै बनाउन नसक्ने मुडमा देखिन्छन् र गठबन्धन उनीहरुका लागि बाध्यकारी हुनेछ । त्यसैले चुनावमा सिद्धान्त भन्दा पनि गठजोड कसरी मजबूत बनाउने र सरकार बनाउने तर्फ स्टार प्रचारकहरुको ध्यान छ ।
