काठमाडौं ।काठमाडौं क्षेत्र नं. २ मा सत्तारुढ गठबन्धनका उम्मेदवारहरुले घरदैलो शुरु गरेका छन् ।
गठबन्धनको तर्फबाट काठमाडौं क्षेत्र नं. २ मा प्रतिनिधि सभा र प्रदेश सभाका उम्मेदवारहरुले बिहीवारदेखि संयुक्त रुपमा घरदैलो शुरु गरेका हुन् ।
प्रतिनिधि सभा सदस्य उम्मेदवार नेकपा (माओवादी केन्द्र) की नेतृ ओनसरी घर्ती, क्षेत्र नं. २ (क) का प्रदेश सभा सदस्य उम्मेदवार नेपाली काँग्रेसका नेता ध्रुव केसी र क्षेत्र नं. २ (ख) का प्रदेश सभा सदस्य उम्मेदवार नेकपा (एकीकृत समाजवादी) का नेता भरतप्रसाद फुँयालसहित गठबन्धनमा आवद्ध दलका नेता, कार्यकर्ताको टोलीले घरदैलो गरेको हो ।
टोलीले बिहीवार पेप्सीकोलादेखि नरेफाँटसम्म घरदैलो गरेको छ । घरदैलोको क्रममा हाते माइकबाट उम्मेदवारहरु घरदैलोमा आउनुभएको भन्दै प्रचार गरिएको थियो भने आ–आफ्नो पार्टीको चुनाव चिन्ह अंकित झण्डा पनि बोकिएको थियो । सहभागी नेता, कार्यकर्ताहरुले ‘आयो, आयो, गठबन्धन आयो’ भन्दै नाराबाजीसमेत गरेका थिए ।
मतदाताको घर–घरमा नमस्ते गर्दै पुगेका उम्मेदवारहरुले गठबन्धनका उम्मेदवारहरुलाई मत दिन आग्रह गरिरहेको देख्न सकिन्थ्यो ।
