काठमाडौँ । रुपन्देही क्षेत्र नम्बर २ का स्वतन्त्र उम्मेदवार डा कमल भुसाल पनि आफ्नो उम्मेदवारी खारेजीविरुद्ध अदालत पुगेका छन् ।
असोज २८ गते शुक्रबार भुसालले निर्वाचन आयोग लगायतलाई विपक्षी बनाई रिट निवेदन दर्ता गराएका हुन् । निर्वाचन अधिकृतको कार्यालयले राजु गुरुङसँगै उनको पनि उम्मेदवारी खारेज गरिदिएको थियो ।
आफ्नो उम्मेदवारी कायम नै रहनुपर्ने माग गर्दै दर्ता गरिएको रिट निवेदन आइतबार वरिष्ठतम् न्यायाधीश विश्वम्भरप्रसाद श्रेष्ठको इजलासमा परेको छ ।
निर्वाचन अधिकृतको कार्यालयले लाभको पद लिएको भनी भुसालको उम्मेदवारी खारेज गरेको थियो । तर डा भुसालले आफू एमडीमा अध्ययनरत रहेको र राज्यले निर्वाह भत्ता दिएको आधारमै लाभको पद लिएको भन्न नमिल्ने उनले बताएका छन् ।
एमडीमा अध्ययनरत रहेको कारण छात्रवृत्ति दिएको नभई अध्ययनसँगै काम पनि गर्नुपर्ने भएकाले काम वापतको निर्वाह भत्ता दिएको उनको जिकिर छ । त्यसलाई राज्यबाट लाभ लिएको भन्न नमिल्ने उनले रिट निवेदनमा उल्लेख गरेका छन् ।
बदनियतपूर्वक आफ्नो उम्मेदवारी खारेज गरेको भन्दै उनले निर्वाचन अधिकृतलाई समेत विपक्षी बनाई रिट दायर गरेका छन् ।
रुपन्देही २ मा नेकपा -एमाले_ का उपाध्यक्ष विष्णु पौडेलसमेत उम्मेदवार छन् । उनलाई विशेष फाइदा पुग्ने गरी निर्वाचन अधिकृतले नेकप (माओवादी केन्द्र) का राजु गुरुङ र डा भुसालको उम्मेदवारी खारेजगरेको आरोप लगाइएको छ ।
