काठमाडौं । बिहीबारदेखि जारि नेपाली काँग्रेस केन्द्रीय कार्यसमिति बैठक आज पनि बस्ने भएको छ । बैठक पार्टी सभापति शेरबहादुर देउवाको निवास बूढानीलकण्ठमा दिउँसो २ बजे बस्ने भएको हो ।
बैठकमा महाधिवेशन निर्वाचन निर्देशिका, क्रियाशील सदस्य केन्द्रीय छानविन समिति र समायोजन समितिको प्रतिवेदन पारित हुने तय भएको छ । बैठकले १४ औं महाधिवेशनको नयाँ कार्यतालिका पारित गर्न सक्ने जनाएको छ । यद्यपि बैठकमा कार्यतालिका पेस भएको छैन ।
भदौ १६–१९ का लागि निर्धारित १४ औं महाधिवेशन सार्ने सम्बन्धमा काँग्रेसभित्र मतभेद छ । विहीबार र शुक्रबारको बैठकमा बोल्ने केन्द्रीय सदस्यहरूमा दुई खाले मत विभाजन देखिएको छ ।
संस्थापन पक्षबाट आउँदो मंसिरभित्र महाधिवेशन गर्ने गरी धारणा आइरहेको छ भने संस्थापन इत्तर समूहले असोजमै महाधिवेशन गर्नुपर्नेमा जोड दिएको छ । बैठकमा आउने रायलाई समेटेर नयाँ कार्यतालिका ल्याउने महामन्त्री पूर्णबहादुर खड्काले बताए ।
उनका अनुसार शनिबारको बैठकमा नयाँ कार्यतालिका आउने सम्भावना छ । उनले भने, ‘केन्द्रीय सदस्यहरुले आ आफ्नो धारणा राखिराख्नु भएको छ । त्यो क्रम आज पनि जारी रहन्छ । उहाँहरुले धारणा राख्ने क्रम सकिए आजै पनि नयाँ कार्यतालिका बैठकमा पेस हुन्छ ।’
काँग्रेस नेताहरुका अनुसार भदौमा वडा अधिवेशन गरेर मंसिरमा महाधिवेशन गर्ने गरी नयाँ कार्यतालिका आउने सम्भावना छ । विहीबार र शुक्रबार बोल्ने केन्द्रीय सदस्यहरुले महाधिवेशनको कार्यतालिका बैठक पेस नगरेकोमा विरोध जनाएका थिए ।
