काठमाडौँ । शताब्दी पुरुष सत्यमोहन जोशीलाई डेंगु संक्रमण भएको छ ।
केही दिनदेखि निरन्तर कमजोर महसुस हुने, खानामा अरुचि हुने जस्ता समस्या देखिएपछि उहाँलाई शुक्रबार किस्ट अस्पतालमा भर्ना गरिएको छ ।
अस्पतालका अनुसार चिकित्सकहरूले स्वास्थ्य जाँच गर्दा उहाँमा डेंगु संक्रमण पुष्टि भएको हो । उहाँको अस्पतालमा चिकित्सकहरूको निरन्तर निगरानीमा उपचार भइरहेको छ ।
जोशीलाई मेडिसिन, पल्मोनोलोजी, युरोलोजी, कार्डियोलोजी, नेफ्रोलोजीका चिकित्सकले संयुक्त रुपमा जाँच गरेको अस्पतालले जनाएको छ ।
अस्पतालको डिलक्स क्याबिनमा उपचाररत उहाँको अवस्था चिन्ताजनक देखिए पनि डराइहाल्नुपर्ने अवस्था नरहेको पनि अस्पतालले जनाएको छ ।
