एजेन्सी । अफगानिस्तानले युएईमा जारी एसिया कप २०२२ क्रिकेटमा सुपर ४ मा स्थान बनाएको छ ।
मंगलबार राति सम्पन्न खेलमा बंगलादेशलाई ७ विकेटले हराउँदै अफगानिस्तानले लगातार दोस्रो जितसहित सुपर ४ मा स्थान बनाएको हो । बंगलादेशले दिएको १२८ रनको लक्ष्य अफगानस्तानले १८ ओभर ३ बलमा ३ विकेट गुमाएर पूरा गर्यो ।
अफगानिस्तानका नाजिबउल्लाह जाड्रानले अविजित रहँदै सर्वाधिक ४३ रन जोडे । यस्तै, इब्राहिम जाड्रानले ४१ बलमा ४ चौकासहित ४२ रनमा अविजित रहे । हाज्रातुल्लाह जाजइले २३ रन बनाए ।
बंगलादेशका लागि शकिब अल हसन, मोसाडिक होसेन र मोहम्मद साईफुदिनले १/१ विकेट लिए। त्यसअघि पहिले ब्याटिङ गरेको बंगलादेशले २० ओभरमा ७ विकेट गुमाएर १२७ रन बनाएको थियो।
बंगलादेशका मोसाडिक होसेनले अविजित ४८ रन बनाए। उनले ३१ बलमा ४ चौका र १ छक्का प्रहार गरे । यस्तै, महमुदुल्लाहले २७ बलमा १ चौकासहित २५ रन जोडे । मेहेदी हसनले १४ रन बनाए ।
अफगानिस्तानका मुजिबउर रहमान र राशिद खानले ३/३ विकेट लिए । यस जितसँगै समूह बी को अफगानिस्तानले २ खेलमा ४ अंक जोडेको छ । पहिलो खेलमा अफगानिस्तानले श्रीलंकालाई ८ विकेटले हराएको थियो ।
अफगानिस्तान अंक तालिकाको शीर्ष स्थानमा रहँदा पराजित बंगलादेश भने अंकविहीन रहेको छ ।
