एजेन्सी । भारतले एसिया कप २०२२ को विजयी सुरुवात गरेको छ । आफ्नो पहिलो खेलमा भारतले पाकिस्तानलाई ५ विकेटले पराजित गरेको हो ।
आइतबार राति दुबईस्थित दुबई अन्तर्राष्ट्रिय क्रिकेट मैदानमा भएको खेलमा पहिले ब्याटिङ गरेको पाकिस्तानले १९.५ ओभरमा १४७ रन बनाएको थियो ।
मोहम्मद रिजवानले ४३ रन बनाए । भुवनेश्वर कुमारले चार र हार्दिक पाण्ड्याले तीन विकेट लिए ।
जवाफमा भारतले १९.४ ओभरमा ५ विकेटले जित हात पारेको थियो । हार्दिकले छक्का लगाएर खेलको अन्त्य गरे । भारतका लागि विराट कोहलीले ३५ रन, रविन्द्र जडेजाले २९ बलमा ३५ रन र हार्दिक पाण्ड्याले १७ बलमा ३३ रन बनाए । पाकिस्तानका लागि मोहम्मद नवाजले तीन र नसिम शाहले दुई विकेट लिए ।
एसिया कपमा भारतले पाकिस्तानलाई लगातार चौथो पटक पराजित गरेको छ । यसअघि सन् २०१६ मा भारतले पाकिस्तानलाई पाँच विकेटले पराजित गरेको थियो। यसपछि २०१८ एशिया कपमा टीम इन्डियाले पहिलो खेलमा ८ विकेट र दोस्रो खेल नौ विकेटले पराजित गरेको थियो ।
यो जितसँगै भारतले पाकिस्तानसँग २०२१ को टी–२० विश्वकपमा पराजयको बदला पनि लिएको छ । दुबई अन्तर्राष्ट्रिय स्टेडियममा सन् २०२१ को टी–२० विश्वकपमा पाकिस्तानले भारतलाई १० विकेटले पराजित गरेको थियो ।
भारतीय टोलीले अब आफ्नो अर्को खेल अगस्ट ३१ मा हङकङसँग खेल्नेछ । त्यस्तै, पाकिस्तानको टोलीले सेप्टेम्बर २ मा हङकङसँग खेल्नेछ ।
