काठमाडौँ । नेकपा (एमाले) का सचिव योगेश भट्टराईले राष्ट्रपति विद्यादेवी भण्डारीले आयोजना गर्नुभएको औपचारिक तथा अनौपचारिक भेटघाट र छलफलहरुलाई अनावश्यक सक्रियता भनी टिप्पणी गरिएको बताउनुभएको छ ।
सामाजिक सञ्जाल फेसबुकमा उहाँले एक पोस्ट गर्दै पूर्वराष्ट्रपति डा रामवरण यादवले आयोजना गर्नुभएका औपचारिक तथा अनौपचारिक भेटघाट र छलफलमा भाग लिएका वरिष्ठ व्यक्तिहरुले नै वर्तमान राष्ट्रपति भण्डारीले त्यस्तै काम गर्दा अनावश्यक सक्रियता भनी टिप्पणी गरेको बताउनुभयो ।
उहाँले राष्ट्रपतिले गर्ने यस्ता औपचारिक तथा अनौपचारिक भेटघाट र छलफल हिजो पनि ठीक रहेको र आज पनि ठीक रहेको बताउनुभएको छ ।
संघीय सदनको दुवै सदनबाट पारित भई प्रमाणीकरणका लागि राष्ट्रपतिकहाँ पुगेको नागरिकता विधेयक पुनर्विचार गर्न भन्दै राष्ट्रपति भण्डारीले संसद्मै फिर्ता पठाउनुभएको थियो । प्रतिनिधिसभाले विधेयकमाथि कुनै पुनर्विचार नै नगरी हुबहु पारित गरेपछि सो विधेयकबारे राष्ट्रपतिले पछिल्ला केही दिनमा विभिन्न अनौपचारिक भेटघाट र छलफल गर्दै आउनुभएको छ ।
राष्ट्रपतिको सो कदमलाई सत्ता गठबन्धनका केही नेताले राष्ट्रपतिले अनावश्यक सक्रियता बढाएको भन्दै टिप्पणी गरेका छन् ।
