काठमाडौँ । नेकपा (एमाले) को ललितपुरको बालकुमारीस्थित तुल्सीलाल स्मृति प्रतिष्ठानमा पोलिटब्यूरो बैठक सुरु भएको छ ।
बैठकमा एमाले अध्यक्ष केपी शर्मा ओलीले आगामी प्रतिनिधिसभा सदस्य र प्रदेशसभा सदस्य निर्वाचनका विषय राख्नुभएको एजेन्डामा छलफल भइरहेको छ । पार्टीको बुधबार भएको स्थायी समिति बैठकले आगामी निर्वाचनमा पार्टीले कुनै पनि दलसँग गठबन्धन नगर्ने तर जुनसुकै दलसँग पनि चुनावी तालमेलका लागि ढोका खुला राख्ने निर्णय गरेको थियो ।
आजको पोलिटब्यूरो बैठकमा प्रदेश र प्रतिनिधिसभामा पठाउने उम्मेदवार र उम्मेदवार बन्ने प्रक्रियाबारे छलफल हुने बताइएको छ । साथै स्थायी समितिले पारित गरेको निर्णयलाई समेत पोलिटब्यूरो कमिटीले अनुमोदन गर्ने कार्यसूचीमा उल्लेख छ ।
