एजेन्सी । इंग्लिस प्रिमियर लिग फुटबल अन्तर्गत म्यान्चेस्टर युनाइटेडले पहिलो जित निकालेको छ । सोमबार मध्यरातमा सम्पन्न खेलमा युनाइटेडले लिभरपुललाई २–१ गोलले पराजित गरेको हो ।
घरेलु मैदान वल्ड ट्राफोर्डमा युनाइटेडलाई जित दिलाउन जाडोन सान्चो र मार्कुस रासफोर्डले गोल गरे भने मोहमद सलाहले गरेको गोल लिभरपुलका लागि सान्त्वना गोल सावित भयो ।
खेलको १६ औं मिनेटमा सान्चोले गोल गर्दै युनाइटेडलाई सुरुवाती अग्रता दिलाएका थिए ।
खेलको पहिलो हाफ युनाइटेडले १–० अग्रता बनाउँदै सकियो । दोस्रो हाफको ५३ औं मिनेटमा रासफोर्डले गोल गर्दै युनाइटेडको अग्रता दोब्बर पारे ।
खेलको ८१ औं मिनेटमा सलाहले गोल गर्दै लिभरपुललाई खेलमा फर्काए । त्यसपछि खेलमा थप गोल हुन सकेन र नतिजा युनाइटेडको पक्षमा गयो ।
जितसँगै ३ खेलबाट ३ अंक जोडेको युनाइटेड तालिकाको १४ औं स्थानमा रहेको छ भने लिभरपुल २ अंकसहित १६ औं स्थानमा छ ।
