एजेन्सी । इंग्लिस प्रिमियर लिग फुटबल अन्तर्गत म्यान्चेस्टर सिटीले बराबरी खेलेको छ । आइतबार राति सम्पन्न खेलमा सिटीले न्युक्यासल युनाइटेडसँग बराबरी खेल्दै अंक बाँडेको हो ।
पाहुना टोली सिटीले खेलको पाँचौं मिनेटमा नै इल्काए गुन्डोवानको गोलबाट सुरुवाती अग्रता बनाएको थियो । बर्नाडो सिल्भाले उपलब्ध गराएको पासलाई उनले गोलमा परिणत गरे । यता, २८ औं मिनेटमा मिग्वेल अल्मिरनले गोल गर्दै न्युक्यासललाई १–१ को बराबरीमा ल्याए ।
यस्तै, खेलको ३९ औँ मिनेटमा कालुम विल्सनले गोल गर्दै न्युक्यासललाई २–१ को स्थितीमा पुर्याए । ५४ औं मिनेटमा किएरन ट्रिपरले गोल गर्दै न्युक्यासलको अग्रता ३–१ पारे । उनले फ्रिकिकबाट सानदार गोल गरे ।
त्यसपछि सिटी खेलमा फर्कियो । ६० औं मिनेटमा एर्लिङ हालाण्डले गोल गरे । ६४ औं मिनेटमा बर्नार्डो सिल्भाले गोल गर्दै सिटीलाई ३–३ गोलको बराबरीको स्थितीमा पुर्याए । बराबरीसँगै ३ खेलबाट ७ अंकसहित सिटी अंकतालिकाको दोस्रो स्थानमा रहेको छ । समान खेल खेलेको न्युक्यासल ५ अंकसहित छैटौं स्थानमा छ ।
