दाङ । नेकपा एमाले दाङले राप्ती प्रादेशिक अस्पताल तुलसीपुरका निमित्त मेडिकल सुपरिटेन्डेन्ड डा. विनोद सिंहमाथि कालोमोसो दल्ने दुईजनालाई साधारण सदस्य समेत नरहने गरि कारबाही गरेको छ ।
शुक्रबार दिउँसो पौने २ बजेतिर डा. सिंहमाथि कालोमासो दल्ने एमाले निकट अनेरास्ववियुका जिल्ला संयोजक सर्जन परियार र सहसंयोजक दिवस क्षेत्रीलाई कारवाही गरिएको हो ।
एमाले दाङका अध्यक्ष हुकुमबहादुर बस्नेत र सचिव मनोहर बुढाथोकीले एक विज्ञप्ति जारी गरि डा. सिंहमाथि कालोमोसो दल्ने कार्यप्रति निन्दा गर्दै कानुन वमोजिम कारवाहीको माग गरेका छन् ।
संयोजक परियारकी श्रीमतीलाई टाइफाइडको उपचारका लागि विहीबार प्रादेशिक अस्पतालमा लगिएको रअस्पतालमा कल्चर चेकजाँचको सेवा नभएपछि मेसु सिंहसँँग विवाद सिर्जना भएको थियो । डा.सिंहले अस्पतालमा कल्चर सेवा नै नभएकाले त्यो सेवा प्रदान गर्न नसकिने बताएका थिए । त्यसपछि शुक्रबार ४/५ जना युवाहरुले कार्यकक्षमै आएर मोसो दलेर भागेका थिए ।