काठमाडौँ । केहीदिनदेखि सामाजिक सञ्जालमा ‘दुई मेयरको जुहारी’ले निकै चर्चा पाएको छ । काठमाडौँ महानगरपालिकाका मेयर बालेन्द्र साह र सुनसरीको धरान उप–महानगरपालिकाका मेयर हर्कराज साम्पाङ राईबीचको फेसबुकमा भनाभनले सामाजिक सञ्जाल तातिएको हो ।
आज शुक्रबार बिहान मेयर साम्पाङले भिडियोमार्फत दिएको एक अधिव्यक्ति अहिले निकै चर्चामा छ ।
उनले भिडियोमा भनेको जस्ताको तस्तै – ‘विशेषगरी यो मेरो लाईभचाहीँ मेरो विरोधीहरुलाई है । तपाईहरुको विरोधले हुन त के ख्यास्छ र ख्यास्न त । केहीपनि ख्यास्दैन म त आफ्नो वेमा हिड्ने मान्छे हो । तर मेरो विरोधले चाहीँ तपाईहरुलाई निकै पोल्दोरछ । जुनदिनसम्म काठमाडौँको फोहोर सोहोरिँदैन, सफा हुँदैन तबसम्म धरानलेमात्र होइन चारैतिरबाट प्रहार गर्नुपर्छ । काम न काजका हरु ।’
उनको यसप्रकारको अभिव्यक्तिलाई नकरात्मक रुपमा टिप्पणी गरिएको छ । एकजना प्रयोगकर्ता लेख्छन् – तपाइको उचाइ घट्दै छ है दाजु ! महान बन्न लाई बिचार र व्यवहार दुबै महान हुन पर्छ हजुर जस्तो ब्यक्ती के बोल्दा र लेख्दा ध्यान पुर्याउनु होला ।
यस्तै अर्का एक प्रयोगकर्ता लेख्छन् – हजुर यसरी नै कराउनु भयो भने हजुरलाई कसैले साथ दिने वाला छैन ।
एक प्रयोगकर्ताको सुझाव छ – तपाईंका विगत २३ दिनका फेसबुक गतिविधि देख्दा रित्तो गाग्रीले बढी आवाज निकाल्छु भन्ने उखान साँच्चिकै हो रैछ कि भन्ने लाग्दैछ। फेसबुक चलाउन कम गरे तपाईंकै हित हुने थियो होला
