काठमाडौं । आजको प्रतिनिधिसभाको बैठकमा नेकपा एमालेकी सांसद निरुदेवी पालले निहारिका राजपूतको बच्चाको डीएनए टेस्टमा सरकार किन डराइरहेको छ ? भनी प्रश्न गरेकी छन् ।
प्रतिनिधिसभाको विशेष समयमा बोल्दै पालले निहारिकाले अभियुक्त शिवराज श्रेष्ठसँगको डीएनए टेस्टको माग गरिरहदा सरकार तयार नहुनुमा पनि खोट रहेको आशंका गरेकी छन् ।
सामाजिक सञ्जालमा आएका प्रमाणहरू को दोषी भन्ने प्रमाणित भइसक्दा पनि उनको मागअनुसार डीएनए परीक्षण नहुनु दु:खद रहेको उनले बताइन् ।‘नारीको अस्मितालाई खेलौनाका रूपमा हेरिरहेको यो समाजमा हिम्मत गरेर अगाडि बढिरहेकी छन् निहारिका राजपूत,’ उनले भनिन्, ‘आफूमाथि भएको बलात्कार र बलात्कारबाट जन्मिएको सन्तानको न्यायका लागि पटकपटक अनशनसँगै र आत्महत्याको प्रयाससमेत भएको छ । सामाजिक सञ्जालमा आएका प्रमाणहरूले जनताले समेत अन्याय भएको थाहा पाइरहँदा अदालतले समेत न्याय नदिने यो कस्तो विडम्बना ?’
सांसद पालले परमादेशबाट आएको सरकारले जनताको आवाज नसुन्ने भन्दै सरकारको कटाक्ष गरेकि छिन् ।
