काठमाडौँ । आगामी संघ र प्रदेश सदस्यको निर्वाचनका लागि म्यादी प्रहरी भर्नामा पूर्व म्यादी प्रहरी र पूर्व सुरक्षाकर्मीहरुले विशेष प्राथमिकता पाउने भएका छन्
बिहीवार प्रहरी प्रधान कार्यालयमा आयोजित पत्रकार सम्मेलनमा प्रहरी महानिरीक्षक (आईजीपी) धिरजप्रताप सिंहले यस्तो बताउनुभएको हो । उहाँले हालमा म्यादी प्रहरीको संख्या निक्र्यौल नभइसकेको तर गृह मन्त्रालयमा खर्च र कति सुरक्षाकर्मी खटाउने भन्ने बारेमा छलफलका लागि सूची पठाइसकेको बताउनु भयो । उहाँले म्यादी प्रहरीलाई ४० दिनका लागि भर्ना गर्ने र गत स्थानीय निर्वाचनमा दिएको सेवा सुविधा नै प्रदान गर्ने बताउनु भयो । महानिरीक्षक सिंहले यसबारेमा प्रारम्भिक चरणमा छलफल र तयारी चलिरहेको बताउनु भयो । उहाँले निर्वाचनका लागि आवश्यक सुरक्षा परिचालन दिनेकुरा सम्बन्धित मन्त्रालयबाट प्राप्त भइसकेको बताउनु भयो ।
उहाँले भन्नुभयो, ‘म्यादी प्रहरीको संख्या निक्र्यौल भइसकेको छैन । तर स्थानीय निर्वाचनको भन्दा धेरै हुनेछ । यो संख्या हामीले रिभ्यू गर्दैछौँ । आवश्यक संख्यामा प्राप्त हुनेछ भन्ने आश्वासन आएको छ । ४० दिनको लागि भर्ना गरिनेछ । स्थानीय निर्वाचनमा भर्ना भएका म्यादी प्रहरी र पूर्व सुरक्षाकर्मीलाई विशेष प्राथमिकता दिइनेछ । त्यो भन्दा बाहेकका लागि केही छनोट प्रविधि हुनेछ । यसमा लाग्ने आवश्यक खर्च, तिनीहरुलाई गत स्थानीय निर्वाचनमा पाए सरहको सुविधा हुनेछ । यो प्रारम्भिक छलफलको चरणमा छ । हामी मंसिर ४ को निर्वाचनको तयारीमा छौँ । प्रारम्भिक चरणमा गरिने कामको तयारीमा छौँ । म्यादी प्रहरी, नेपाल प्रहरीहरु खटाउँदा लाग्ने खर्चको बारेमा गृह मन्त्रालयमा पठाइसकेका छौँ ।’
उहाँले नेपाल प्रहरी निर्वाचनको तयारीका साथै अपराध अनुसन्धान र नियन्त्रणमा पनि गम्भीर बनिरहेको बताउनु भयो ।
