एजेन्सी । इंग्लिस फुटबल कप एफए कम्युनिटी शिल्डको उपाधि लिभरपुलले जितेको छ । शनिबार राति किंग पावर स्टेडियममा भएको फाइनल खेलमा म्यान्चेस्टर सिटीलाई ३–१ गोलले पराजित गर्दै लिभरपुलले उपाधिमाथि कब्जा जमाएको हो ।
अति नै रोमाञ्चक बनेको खेलमा लिभरपुललाई उपाधि दिलाउन ट्रेन्ट एलेक्जेन्डर आर्नोल्ड, मोहमद सलाह र डार्विन न्युनेजले १–१ गोल गरे । खेलको २१ औं मिनेटमा आर्नोल्डले लिभरपुललाई सुरुवाती अग्रता दिलाए । सलाहले उपलब्ध गराएको पासलाई उनले पेनाल्टी क्षेत्र बाहिरबाट प्रहार गर्दै गोलमा परिणत गरे ।
यता, सिटीका फरवार्ड जुलियन अल्भारेजले ७० औं मिनेटमा गोल गर्दै खेल बराबरीमा ल्याए । दोस्रो हाफमा वैकल्पिक खेलाडीको रुपमा मैदान छिरेका उनले फिल फोडेनको प्रहारलाई रिबाउन्डमा गोल गरेका हुन् ।
८३ औं मिनेटमा सलाहले पेनाल्टीमार्फत गोल गर्दा लिभरपुल २–१ को स्थितीमा अघि बढ्यो । यस्तै, इन्जुरी समयमा यसै सिजन मोटो रकममा पोर्चुगीज क्लब बेन्फिकाबाट लिभरपुल आएका न्युनेजले गोल गर्दै लिभरपुललाई सिजनको पहिलो उपाधि दिलाए ।
यी दुई क्लबबीच इंग्लिस प्रिमियर लिग विजेता सिटी र एफ ए कप विजेताको रुपमा लिभरपुलबीच प्रतिस्पर्धा भएको हो ।
