एजेन्सी । अभिनेता रणवीर कपुरको बहुप्रतिक्षित फिल्म ‘शमशेरा’ शुक्रबारबाट प्रदर्शनमा आएको छ । चलचित्रले दर्शक र समीक्षकबाट मिश्रित प्रतिक्रिया पाइरहेको छ ।
यसैबीच ‘शमशेरा’ ले पहिलो दिन बक्स अफिसमा राम्रो कमाई गर्न असफल भएको छ ।
रिपोर्टका अनुसार १५० करोडभन्दा बढीको बजेटमा बनेको ‘शमशेरा’ले पहिलो दिन बक्स अफिसमा १०.२५ करोड मात्रै कलेक्सन गरेको छ । यो फिल्म विश्वभर ५ हजार ५ सय स्क्रिनमा रिलिज भएको थियो । यस्तै, फिल्मले भारतमा ४ हजार ३५० स्क्रिन पाएको भएपनि फिल्मले राम्रो ओपनिङ गर्न सकेन ।
पहिलो दिनको खराब प्रदर्शनपछि फिल्मका धेरै शो विश्वभर रद्द गरिएको बताइएको छ । रणवीर चार वर्षपछि ‘शमशेरा’ मार्फत फर्किएका छन् । उनी पछिल्लो पटक सन् २०१८ मा रिलिज भएको सञ्जय दत्तको बायोपिक ‘सञ्जु’ मा देखिएका थिए ।
यदि ‘शमशेरा’ ले १६५ करोडभन्दा बढीको अल टाइम व्यापार गर्छ भने यो फिल्म हिट मानिने छ । तर, ट्रेड विश्लेषकहरुले यो फिल्म बक्स अफिसमा फ्लप साबित हुने अनुमान गरेका छन् ।
करण मल्होत्राको निर्देशनमा बनेको यस फिल्ममा रणवीरका अलावा संजय दत्त, वाणी कपूर, रोनित रोय र सौरभ शुक्ला लगायतको अभिनय रहेको छ ।
