काठमाडौं । सञ्चार तथा सूचना प्रविधिमन्त्री एवं नेपाली काँग्रेसका नेता ज्ञानेन्द्रबहादुर कार्कीले चाँडै नेपाल दक्षिण एशियामा सबल अर्थतन्त्र भएको मुलुकको रुपमा परिणत हुने उद्घोष गर्नुभएको छ ।
शुक्रवार हेटौंडामा आयोजित नेपाल प्रेस युनियनको ९ औं महाधिवेशनलाई सम्बोधन गर्दै उहाँले यस्तो दाबी गर्नुभएको हो । उहाँले नेपाल श्रीलंकाको बाटो नगएको दाबी गर्नुभयो । उहाँले नेपालको अर्थतन्त्रमा केही समस्या रहेपनि श्रीलंका पथ्मा नेपाल नरहेको बताउनु भयो । उहाँले आगामी १० वर्षमा नेपाललाई सबल अर्थतन्त्र भएको मुलुकको रुपमा परिणत गरेर अघि बढ्ने बताउनु भयो । मन्त्री कार्कीले सरकार संविधानले परिकल्पना गरेको प्रेस स्वतन्त्रता, अभिव्यक्ति स्वतन्त्रता र नागरिकको हकको रक्षा गर्नका निमित्त प्रतिवद्ध रहेको पनि दाबी गर्नुभयो । उहाँले सरकार दक्षिण एशियामा नै प्रेस स्वतन्त्रताको अग्रणि देशको रुपमा नेपाललाई स्थापित गर्न प्रतिवद्ध रहेको बताउनु भयो ।
उहाँले भन्नुभयो, ‘यो सरकार संविधानले परिकल्पना गरेको प्रेस स्वतन्त्रता, अभिव्यक्ति स्वतन्त्रता र नागरिकको हकको रक्षा गर्नका निमित्त प्रतिवद्ध छ । त्यतिमात्र होइन, नेपाली काँग्रेस सदैव प्रेस स्वतन्त्रतालाई अक्षुण्ड राख्न चाहन्छ । यो सरकार दक्षिण एशियामा नै प्रेस स्वतन्त्रताको अग्रणि देशको रुपमा नेपाललाई स्थापित गर्न चाहन्छ । अहिले देशमा हरेक चोकचोकमा एउटा अफवाह फैलाइएको छ ।
नेपाल श्रीलंकाको बाटोतर्फ गइरहेको छ भनेर । नेपाल श्रीलंकाको पथमा अग्रसर हुँदैछ भन्ने अफवाह छ, नेपालको अर्थतन्त्रमा केही समस्याहरु छन्, तर नेपाल श्रीलंकाको पथमा जाँदैन । जुन भ्रम छ त्यसलाई चिरेर नेपाली जनतालाई, हामीले आश्वस्त गर्न जरुरी छ । नेपाल चाँडै नै दक्षिण एशियामा सबल अर्थतन्त्र भएको मुलुकको रुपमा स्थापित हुनेछ, अब चाँडै संघ र प्रदेशको चुनाव आउँदैछ, यसबाट हामीले १० वर्षमा नेपाललाई सबल अर्थतन्त्र भएको मुलुकको रुपमा परिणत गर्ने गरेर जानुपर्छ ।’ सञ्चारमन्त्री कार्कीले एमसीसी पास गरेपछि नेपालको अर्थतन्त्रमा सकारात्मक प्रभाव परिरहेको बताउनु भयो ।
