एजेन्सी । इंग्लिस प्रिमियर लिग फुटबल अन्तर्गत लिग लिडर म्यान्चेस्टर सिटीले कठिन जित निकालेको छ । शनिबार राति भएको खेलमा सिटीले एभर्टनलाई १-० गोलले पराजित गरेको हो ।
सिटीलाई जित दिलाउन एकमात्र निर्णायक गोल फिल फोडेनले गरे । खेलको ८२ औं मिनेटमा उनले गोल गरेका हुन् ।
जितसँगै सिटीले दोस्रो स्थानमा रहेको लिभरपुलसँग ६ अंकको अग्रता बनाएको छ । सिटीको २७ खेलबाट ६६ अंक रहेको छ ।
यस्तै एभर्टन २४ खेलबाट २२ अंकसहित १७ औं स्थानमा रहेको छ ।
यसैबीच, शनिबार राति नै भएको अर्को खेलमा म्यान्चेस्टर युनाइटेड र वाटफार्डले बराबरी खेलेका छन् ।
वाटफोर्डको मैदानमा भएको खेलमा दुबै टिमले गोलरहित बराबरी खेल्दै अंक बाँडेका हुन् ।
खेलमा युनाइटेडले दबाब राखेपनि गोल भने गर्न सकेन । बराबरीसँगै युनाइटेड २७ खेलबाट ४७ अंकसहित चौंथो स्थानमा रहेको छ भने २६ खेलबाट १९ अंकसहित वाटफोर्ड १९ औं स्थानमा छ ।
