काठमाडौँ । पूर्वपोलिटब्यूरो सदस्य ओमप्रकाश पुनसहित चार नेताले नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी परित्याग गरेका छन् ।
सेती महाकाली इन्चार्जसमेत रहेका पुन, पूर्वसभासद तथा सेती ब्यूरो इन्चार्ज शंकरबहादुर खड्का, नवौँ महाधिवेशन आयोजक कमिटी सदस्य दलबहादुर धामी र पूर्व दार्चुला तथा कञ्चनपुर जिल्ला इन्चार्ज रमेश परियारले विप्लवको पार्टी छाडेका हुन् ।
उनीहरुले जारी गरेको संयुक्त प्रेस विज्ञप्तिमा अहिलेको बदलिँदो विश्व राजनीति र राष्ट्रिय राजनीतिलाई मध्यनजर गरी अबको राजनीतिक धारा र बाटो बदल्ने निर्णयमा पुगेको उल्लेख छ ।
माओवादी धारालाई एकीकृत र धुर्वीकृत गर्ने व्यक्तिगत र सामूहिक पहलमा अघि बढ्नुपर्ने वस्तुगत आवश्यकतालाई महसुस गरी नेपाल कम्युनिष्ट पार्टीबाट अलग रहने निर्णय गरेको उनीहरुको राजीनामा पत्रमा उल्लेख छ ।
