काठमाडौं । आगामी निर्वाचनका लागि काठमाडौंमा स्वतन्त्र उम्मेदवारहरुको घोषणा गर्ने क्रम बढिरहेका बेला काठमाडौं क्षेत्र नम्त्रर ४ मा युवा इन्जिनियर आकर्षण पोखरेलले पनि उम्मेदवारी घोषणा गरेका छन् ।
क्षेत्र नम्बर ४ अन्तर्गत कपनको साततलेस्थित खहरेमा आयोजित कार्यक्रममा पोखरेलले प्रतिनिधिसभा सदस्यमा स्वतन्त्र उम्मेदवार बन्ने घोषणा गरेका हुन् ।
यो क्षेत्र कांग्रेसका महामन्त्री गगन थापाको क्षेत्र समेत हो । उम्मेदवारी घोषणा कार्यक्रममा पोखरेलले गणितीय हिसाबले चुनावमा हार र जित देखिए पनि राजनीतिमा कहिल्यै नहार्ने बताए ।
आफूसँग विकासको एजेण्डा रहेको बताउँदै उनले पाँच बुँदे सूत्र सुनाए । आफू कसैलाई गाली गरेर नेता बन्न नचाहेको तर विकास गर्न सक्ने योजना रहेको पोखरेलको भनाई छ ।
पोखरेलको स्वतन्त्र उम्मेदवारी घोषणामा अभिनेता आर्यन सिग्देल पनि उपस्थित थिए । उनले परिवर्तनका लागि युवालाई अघि सार्नुपर्ने भएकाले इन्जिनियर पोखरेललाई आफ्नो समर्थन रहेको बताए ।
