काठमाडौं । नेकपा (एकीकृत समाजवादी)का अध्यक्ष माधवकुमार नेपालले मंसिरलाई आधार मानेर प्रदेश र संघीय निर्वाचनको तयारी थालेको बताउनुभएको छ ।
आइतबार समाजवादी प्रेस संगठनको आयोजनामा भएको सम्पादकहरूसँगको अन्तरक्रिया कार्यक्रममा बोल्दै उहाँले सो कुरा बताउनुभएको हो ।
सत्ता गठबन्धनमा प्रदेश र संघीय निर्वाचन गर्न मंसिरलाई आधारमा मानिएको भन्दै अध्यक्ष नेपालले अहिलेदेखि नै उम्मेदवारी छनौट र सीट बाँडफाँड थाल्नुपर्ने अवस्था रहेको बताउनुभयो ।
उहाँले भन्नुभयो, ‘गठबन्धन कसरी जोगाउने, निर्वाचनमा जुट्नुपर्ने अवस्था छ। ६ महिनाभित्र चुनाव हुन्छ। मंसिरलाई चुनावको लागि आधारमा मानेका छौं। उम्मेदवार र सीट बाँडफाँडका लागि अहिलेदेखि नै तयारी थाल्नुपर्नेछ ।’
यस विषयमा प्रधानमन्त्री शेरबहादुर देउवा र माओवादी केन्द्रका अध्यक्ष प्रचण्डसँग आइतबारमात्रै छलफल भएको उहाँको भनाई छ ।
यस्तै अध्यक्ष नेपालले एसपीपीमा कुनै शंका नगर्न आग्रह समेत गर्नुभयो ।
‘प्रधानमन्त्रीले आज पनि ुनेपालको हितमाथि कुनै पनि आघात हुने कागजमा म बाट सही हुने छैन भन्नुभएको छ ।’ उहाँले भन्नुभयो ।
