काठमाडौँ । फोरजी सेवा सुरु भएको पाँच वर्षमा यसका प्रयोगकर्ता करिब एक करोड पुगेका छन् । नेपाल दूरसञ्चार प्राधिकरणका अनुसार असारसम्म नेपालमा फोरजी चलाउनेको सङ्ख्या ९९ लाख ५४ हजार नाघेको हो ।
नेपालमा अहिले तीनवटा दूरसञ्चार सेवा प्रदायकले फोरजी सेवा उपलब्ध गराइरहेका छन् । यद्यपि प्रतिस्पर्धा भने मुख्य रूपमा नेपाल टेलिकम र एनसेलबीच मात्र देखिन्छ । प्राधिकरणको तथ्याङ्कअनुसार टेलिकमका फोरजी प्रयोगकर्ता ४७ लाख ४४ हजार नाघेका छन् । एनसेलको सबैभन्दा धेरै ५० लाख ४२ हजार रहेको देखिन्छ । अर्को सेवा प्रदायक स्मार्ट टेलिकमका भने एक लाख ६६ हजार मात्र फोरजी प्रयोगकर्ता रहेका छन् ।
प्रयोगकर्ताको सङ्ख्याको हिसाबले गत आर्थिक वर्ष २०७७/७८ मा फोरजीमा सबैभन्दा धेरै ग्राहक थपिएका छन् । टेलिकमले विगत एक वर्षको अवधिमा मात्रै करिब ४० लाख फोरजी प्रयोगकर्ता थपेको छ ।
त्यस्तै एनसेलले २० लाख फोरजी प्रयोगकर्ता थप गरेको छ । स्मार्ट टेलिकमका भने फोरजी प्रयोगकर्ता घटेको देखिन्छ । एक वर्षको अवधिमा कम्पनीका करिब ५० हजार फोरजी प्रयोगकर्ता घटेको तथ्याङ्कले देखाउँछ । प्राधिकरणका अनुसार मोबाइलबाट इन्टरनेट प्रयोग गर्नेको कुल सङ्ख्या दुई करोड २८ लाख नाघेको छ । फोरजीबाहेक थ्र्रीजी प्रयोग गर्नेको सङ्ख्या करिब एक करोड २९ लाख रहेको छ । जसमध्ये नेपाल टेलिकमका एक करोड चार लाख थ्रीजी प्रयोगकर्ता छन् भने एनसेलका २४ लाख ६२ हजार छन् ।, समाचार गोरखापत्र दैनिकमा प्रकाशित छ ।
