काठमाडौँ । राष्ट्रियसभा सदस्य वामदेव गौतमले कम्युनिष्ट पार्टीहरुको एकीकरण प्रयासमा आफू पुनः जुट्ने घोषणा गर्नुभएको छ । राष्ट्रियसभाको शुक्रबारको बैठकमा नेता गौतमले केही समयमा घोषणा गरेर नै एकीकरण प्रयासमा लाग्ने बताउनुभयो ।
एकीकरण भइसकेको कम्युनिष्ट पार्टी तीन टुक्रा भइसकेको उल्लेख गर्दै उहाँले आफूले पुनः कम्युनिष्ट आन्दोलनलाई एकीकरण गर्ने महाअभियानमा लाग्ने मनसाय बनाएको बताउनुभयो । उहाँले भन्नुभयो, “एकीकरण प्रयास सफल हुन्छ/हुन्न थाहा छैन ।”
नेपाल कम्युनिष्ट पार्टी विभाजन भएपछि आफू कुनै पनि पार्टीमा नरहेको उहाँको भनाइ थियो । कम्युनिष्टहरु एक हुनुपर्ने आफ्नो विचार रहेको उहाँले सुनाउनुभयो । कम्युनिष्ट पार्टी एक हुनुपर्छ भनेर नै आफूले कुनै पनि कम्युनिष्ट पार्टीका नेताको आलोचना नगरेको गौतमको भनाइ थियो ।
